PROVINCIAL CAPITOL – Nagsugod na subong nga adlaw, Agosto 1, ang pagpauli sang mga internally-displaced persons (IDPs) ukon mga apektado sang paglupok sang Bulkan Kanlaon sa banwa sang La Castellana.
Ginpahayag ni Mayor Añejo Nicor nga las-8:30 sang aga sang nagsugod ang pag-decamp sang 471 ka mga pamilya ukon 1,548 ka mga indibidwal nga gin-evacuate pito ka bulan na ang nakaligad.
Samtang, nagpabilin naman sa evacuation facilities ang 27 ka mga pamilya nga ginakabig nga vulnerable sector kag nagapuyo sa sulod sang 4-kilometer radius permanent danger zone.
Sila ang ginalakipan sang lima ka pamilya gikan sa Barangay Biaknabato, 10 sa Barangay Masulog kag 12 sa Barangay Cabagna-an.
Suno kay Mayor Nicor, nagahulat na lamang sila sang kumpirmasyon gikan sa Provincial Government angot sa pagabaklon nga duta nga patindugan sang relocation site para sa mga ini.