PROVINCIAL CAPITOL – Automatic nga suspendido sa trabaho ang ambulance driver sang Cadiz City LGU nga nadakpan upod sa iya nga nobya sa anti-drug operation sa Barangay Singcang Airport, Bacolod City, Domingo sang gab-i.
Ginpahayag ni Mayor Salvador Escalante Jr. nga regular employee sang ila nga ciudad si alias Riche, 50-anyos, kasado kag residente sang Purok Kapispisan, Barangay Daga, Cadiz City.
Suspendido ini samtang gina-imbestigar sang kapulisan ang kaso matapos ini nadakpan upod sa iya nobya nga si a certain Evon alias Tats, 27-anyos, isa ka homebased callcenter agent nga nakabase diri sa Bacolod City apang tumandok sang Purok Narra 4, Barangay Tinampaan, Cadiz City.
Suno kay Mayor Bading, wala direkta nga nagabaligya sang droga si Riche kag nagaserbe lamang ini nga driver sang pick-up nga ginasakyan sini upod si Evon, nga isa ka high value individual kag “on probation” sa kaso angot man sa illegal drugs.
Sang damlag lang, gin-monitor ang hulag sini matapos naguwa sa intelligence report nga daku ini magpusta sa bulang.
Ginpasiguro naman ni Mayor Escalante nga gilayon iga-dismiss sa serbisyo si Riche kun mapamatud-an nga imbolbado ini sa illegal nga druga.
Nahibaluan nga antes ang Mayo 2025 nga eleksyon, nagpatigayon sang random drug test ang ila nga city government kun sa diin 21 tubtob 22 ang nag-positibo nga ginalakipan sang mga casual employees kag job order workers lakip na ang pila ka mga drivers sang ciudad.
Wala man nakapaidalom si Riche sa drug test bangud suno kay Mayor Bading, possible nga on-duty ini bilang ambulance driver sang amo nga tion.*BCPO Photo