Byernes pa lang nagligad nga semana nakabaton na si Mayor Greg Gasataya sang impormasyon angut sa pagpanukot sang Bacolod Bulk Water Incorporated (BBWI) sa PrimeWater sa wala sini nabayaran nga water supply.
Sa interview kay Mayor Gasataya, ginsiling sini nga nag-ayo siya sa BBWI nga hatagan siya sang tubtob Agosto 11 bangud nga maga-istorya ini sa BACIWA-PrimeWater bangud dako ang mangin epekto sa pumuluyo kon madayon ang pag untat sang suplay sang tubig. Diri may natigayon nga mga arrangements.
Kaina sang aga, nagsapol si Gasataya kag mga representatives sang BACIWA, PrimeWater kag BBWI kag nahibaluan nga may yara sang wala nabayaran nga bill ang PrimeWater sa BBWI halin sang Mayo tubtob Hunyo sini nga tuig.
Suno sa alkalde, nagpasalig ang PrimeWater nga i-settle ang Mayo nga bill subong nga adlaw, kag may arrangements naman para sa June billing.
May mga tikang naman ang mga kompaniya agud indi na masulit ang kaangay nga hitabo.
Ginpahayag dugang ni Mayor Gasataya nga nagpatunga ang ciudad sa suktanay sang BBWI kag PrimeWater para sa general welfare sang mga Bacolodnon.
Una na nga nagpagwa sang advisory sang BBWI nga dapat magpanigana ang mga residente sang Barangay Sum-ag, Cabug, Felisa, Handumanan, Mansilingan, Punta taytay, Pahanocoy kag Tangub bangud sang posible water shortage tinalikdan nga August 9 kag kun indi pa gid makabayad ang Primewater sa BBWI subong nga adlaw, August 11, maga-disconnect ini. | DYHB News