Nasapwan nga wala na sang kabuhi ang lawas sang tatlo ka wala pa makil-an nga mga sa separado nga mga Hacienda sa ciudad sang Talisay subong nga adlaw, Agosto 11, 2025.
Ang una nga nasapwan nga bangkay ang yara sa Hacienda San Isidro, Barangay Concepcion, alas-2:20 sang kaagahon, ikaduha amo ang bangkay nga yara sa Hacienda Minuluan Mendoza, Barangay Matab-ang nga nasapwan alas-9 sang aga samtang ang ikatatlo naman ang nakit-an pasado alas-2 sini nga hapon sa Hacienda San Isidro, Barangay Concepcion lunsay nasakupan tanan sang Talisay City.
Base sa report sang Talisay City Component Police Station, ang una nga nasapwan ang nakit-an sang grupo sang mga pamatan-on kag ini ang gilayon nga ginpahibalo sa kapulisan, ginabulubanta ang bangkay nagapang-edaron sang 45 tubtob 50-anyos, nagasuksok sang blue T-shirt, maong short pants kag green nga tsinelas, narekober man malapit sa bangkay ang black and white nga motorsiklo.
Ang ikaduha naman nga bangkay ang nasapwan nga yara na advanced state of decomposition nga nakit-an sa sulod sang kampo sakop sang Hacienda Minuluan Mendoza kag indi pa sa karon ma pat-od kun babaye kun lalaki bangud ini ang nagaka-agnas na.
Samtang ang ika-tatlo naman nga bangkay nga nasapwan pasado alas-2 sini nga hapon ang nagapang-edaron 35 tubtob 40-anyos, nagasuksok sang blue sando, black jacket, maong pants, kag black rubber shoes kag ini ang may tattoo natuo nga bahin sang iya abaga.
Sa karon, padayun nga ginapatigayon sang kapulisan ang maid-id nga imbestigasyon may angut sa identity sang nagkalasapwan, kalakip na ang motibo ukon gintunaan sang kamatayon sang tatlo ka mga indibidwal.