BACOLOD CITY- Possible isa lang ka supplier sang illegal nga droga ang mga susek sa tatlo ka nagkalain-lain nga drug buy bust operation sa ciudad sang Bacolod sang Agosto 10 kag Agosto 11.
Nahibaluan nagdangat sa P4,760,000 nga balor sang ginapatihan shabu ang narekober sa anom ka suspek sa buy bust operation nga ginpatigayon sa Brgy. Handumanan, Brgy. Mansilingan, kag Brgy. Singcang Airport.
Ginpahayag ni Bacolod City Police Office Director Police Colonel Joeresty Coronica, indi personal nga kilalahay ang anom ka mga suspetsado apang ginalantaw ang possibilidad nga isa lamang sila ka ginakuhaan sang supplay.
Sa inisyal nga impormasyon sang BCPO nagikan sa bahin sang Luzon ang masobra 700 grams nga kabug-aton sang ginapatihan shabu.
Ang amo nga operasyon ang nagapakita sang commitment sang BCPO angot sa kampanya sang illegal nga droga, suno kay Coronica.
Ang mga suspek ang natalana nga magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.