TALISAY CITY- Nagapabilin nga wala sang identity ang tatlo ka bangkay nga nasapwan sa ciudad sang Talisay, Lunes nga adlaw, Agosto 11.
Ginpahayag ni Police Major Rhazl Jim Jocson, Deputy Chief sang Talisay City Police Station, una nga nasapwan ang bangkay sang lalaki sa Hacienda San Isidro, Barangay Concepcion pasado las-2 sang kaagahon, kun sa diin ini ang nagahamyangon.
Ang una nga bangkay ang ginabulubanta naga-edad 45 tubtob 50, ini ang nagasuksok sang blue nga bayo, maong, kag green nga tsinelas.
Narekober sa lugar ang itom nga helmet, isa ka motorsiklo nga euro viper man 150 nga nagaduag sang itom kag puti kag may plaka nga 061609.
Base sa nakuha nga impormasyon sang DYHB sa isa sa mga nakasapo sa bangkay, may pilas sa liog kag duha ka kamot ang biktima.
Samtang, pasado las-2 sang hapon, 200 meters ang kalayuon sa amo nga bangkay, isa pa ka lalaki ang nasapwan sa sulod sang kampo sa amo nga hacienda.
Ang ikaduha nga bangkay sa lugar ang ginabulubanta yara sa 35 tubtob 40 ang edad, nagasuksok sang blue nga sando, itom nga jacket, maong pants, itom nga rubber shoes, kag ini ang may tattoo sa tuo nga abaga.
Narekober sa amo nga bangkay ang isa ka sling bag, kutsilyo, kag yabi sang motorsiklo nga euro.
Suno kay Jocson, ila pa ginausisa kun ang duha ka bangkay ang may kaangtanan sa isa kag isa.
Magluwas sa duha ka bangkay nga nasapwan sa Hacienda San Isidro, las-9 sang aga, nasapwan naman ang isa ka nagakaagnas nga bangkay sang tawo sa Hacienda Minuluan Mendoza, Barangay Matab-ang.
Nasapwan ang nagakaagnas nga bangkay bangod sa nagaalisngaw nga baho sini nga napanimhuan sang mga residente sa lugar.
Magluwas sa suksok sini nga short, wala na sang iban pa nga narekober ang kapulisan.
Ginabulubanta kapin isa na ka bulan nga wala sang kabuhi ang bangkay antes ini nasapwan.
Sa karun padayon ang imbestigasyon sa Talisay PNP angot sa pagkasapo sang tatlo ka bangkay sa ciudad.
Nahibaluan wala sang missing person nga narekord sa lugar.