Desisyunan sang ciudad sang La Carlota bwas nga adlaw kon san-o papulion ang mga evacuees kasunod sang pag-alburuto sang Bulkan Kanlaon Lunes sang gab-i.
Sa interview sang DYHB kay Mayor Rex Jalando-on, may yara sang 64 families kag 260 individuals nga nagatiner pa karon sa tatlo ka mga evacuation centers sa ciudad. May mga evacuees sa Brgy. Yubo, Brgy. Haguimit kag sa Poblacion.
Suno kay Mayor Jalando-on yara sa Poblacion ang mas madamo nga mga evacuees. Kaina, nagpatigayon sang inter-agency meeting ang Regional Disaster Risk Reduction Management Council sa diin nagtambong si Mayor Jalando-on.
Suno sa alkalde, isa sa mga nahisugtan sa inter-agency meeting nga sa ulihi kon may mga masunod pa nga hitabo ukon kalamidad ang Bago City amo ang himuon nga emergency operation center.
Samtang, wala man nakita ni Mayor Jalando-on nga kinahanglan magdeklarar sang state of calamity sa ciudad kasunod sang epekto sang aktibidad sang Bulkan Kanlaon.