BACOLOD CITY – Arestado ang isa ka lalaki nga high value individual kag babayi nga estudyante sa ginpatigayon nga drug buy-bust operation sa Dalan Pallochina, Capitol Heights 2, Barangay Villamonte, Bacolod City las-5:19 kaina sang kaagahon, Hulyo 7.
Kitkit-rehas sa Police Station 4 sanday John Matthew Genon alias “Rolly”, 21-anyos kag kaupod sini nga si Laurrianne Libre, 25-anyos, pareho nga pumuluyo sang Purok Ylac, Barangay 1, Bacolod City.
Positibo nga nakuha sa posesyon sang mga ini ang buy-bust item nga isa ka daku nga plastic sachet nga nagaunod sang suspected shabu upod sa duha ka 1,000 peso bills kag apat ka panid sang boodle money bilang buy-bust item.
Nakumpiskar man ang duha ka putos kag 30 ka dalagku nga plastic sachets nga naga-unod sang suspected shabu upod sa duha ka bundle sang kwarta nga ginapatihan proceeds ukon kita sa pagbaligya sang droga, isa ka violet nga coin purse kag isa ka back pack.
Sa kabug-usan, nagabug-at sang 420 grams kag nagabalor sang P2,856,000 ang nakumpiskar nga droga gikan sa duha. Sila ang pasakaan sang kaso nga paglapas sa RA 9165 ukon Comprehensive Dangerous Drugs Act. I Shutterstock photo