BACOLOD CITY- Pagasakaan sang kaso ang apat ka mga lalaki matapos nga nakuhaan sang kapin ₱500,000 nga balor sang gina-alegar kinawatan nga kable sa Barangay 32, ciudad sang Bacolod, Lunes nga adlaw, Hulyo 8.
Ang mga arestado ang ginkilala nanday Rodel Sodando, 57-anyos, kag Romeo Martir Jr., 49-anyos, lunsay residente sang Barangay Sagua Banua, banwa sang Valladolid; Milo Gersalino, 52-anyos, residente sang Barangay Bata, ciudad sang Bacolod; kag Alberto Dela Paz Jr., 50-anyos, sang Barangay Ayungon, ciudad sang La Carlota.
Base sa interview sang DYHB kay Police Major Elmer Bonilla, Station Commander sang Bacolod City Police Station 1, nadakpan ang amo nga mga persona sang Mobile Patrol Unit, nagpakita pa sang nagakaigo nga dokyumento ang mga akusado apang sa pag-tsekyar sang empleyado ka PLDT, peke ang mga ini.
Natigayon nga ma rekober sa amo nga mga persona ang gin-usar nga truck sa krimen nga ginkargahan sang mga kable, bolt cutter, hacksaw blade, kag isa ka sedan.
Gintingwaan nga mahingagaw ang pag-file sang kaso kahapon, Hulyo 9, apang may kulang pa nga mga dokumento ang PLTD sa pag-file sang kaso nga theft.
Temporaryo nga gin-hilway ang mga suspetsado bangod natapos na ang reglementary period, apang iga-file ang kaso pinaagi sa regular filing.