
Naglab-ot sa kapin 232 ka mga indibidwal nga ginkabug-usan sang 57 ka pamilya ang nangin apektado sang nagluntad nga sunog sa Purok Pasil, Barangay Zone 5, ciudad sang Talisay, pasado ala-una kaina sang hapon, Pebrero 4, 2025.
Sa interview sang DYHB kay Talisay City Social Welfare and Development Office (CSWDO) Head Dionela Madrona ginpahayag sini nga yara na sa city evacuation center nga nahamtang sa Zone 12-A ang tanan nga mga apektado.
Suno sa CSWDO Head magapatigayon ang ciudad sang standard registration sa mga household member kag magapatigayon sang assessment para mahibalo kun pila diri ang totally kag partially damaged.
Naghatag naman sang bulig ang ciudad kag ang mga katapo sang Angels Wings Foundation sa pagpanguna ni Atty. Rowena Weng Lizares sa bahin sang pagkaon kag tubig para sa mga apektado sa nahauna nga gab-I nga pagtinir sang mga ini sa evacuation center.
Pahayag ni Madrona, magahatag ang Talisay City Government sang nagakaigo nga bulig pinansyal para makapatukod ang mga biktima sang sunog sang ila liwat nga puluy-an.
Apang, samtang ang mga ini ang nagapadayun sang pagpatindog sang ila balay, magatanyag ang ciudad sang cash for work kun sa diin makabaton ang mga apektado sang minimum wage assistance samtang nagapadayun ang liwat nga pagpatukod sang ila balay.
Dugang pa sini nga samtang nagapabilin ang mga apektado sa evacuation center, magahatag sang suporta ang ciudad pinaagi sa paghatag sang pagkaon kag maga-provide sang mga kitchen materials agud makaluto ang mga ini.
Sa pihak nga bahin, may pila naman ka mga grupo kag mga organisayon ang nagpatigayon sang donation drive para sa dugang nga bulig sa mga nangin apektado.