Halos human na ang kapin 1.3 kilometro nga kalabaon nga dalan sa bahin sang barangay Cabug pasulod sa barangay Handumanan sa ini nga mga tinion.
Sa karon, ginahikot nalang ang drainage system sa lugar pati na ang proposed sidewalk
Madumduman nga una na ginreklamo sang pila ka mga residente kag motorista sa lugar ang anay gubaon nga dalan sa diin masami ini ginabaha. Sementado matuod pero lubak-lubak man.
Ang ini nga dalan ang masami ginaagyan sang mga jeeps, tricycle, ebike kag mga trucks sang pila ka mga bodega nahamtang sa lugar.
Apang, wala nangin mahapos ang proseso para mapakay-o ang dalan, ini bangud private property ang porsyon sang nasambit nga duta.
Sa karon, gamay nalang nga bahin sang dalan ang padayon nga ginapakay-o, diri nga bahin ipahamtang sang City Engineers Office ang drainage system agud mapaiway na ang pagbaha sa lugar.
Sa nahibaluan, masobra P80M ang ginpain sang ciudad nga budget para sa amo nga proyekto sa diin pagakuhaon ini sa P4.1 billion nga loan sang ciudad sa Development Bank of the Philippines.
