Madamo sang mga kabataan ang handum gid mangin bombero magdako pero ano bala ang sarang mo mahimo para sa imo idol nga mga firefighters? Isa ka lalaki sa UK ang ginhatagan sang suspended prison sentence matapos ini mag-ako nga siya ang nagsindi sang kalayo sa ila balay duha ka beses sa isa ka gab-i agud lang makita ang mga bombero nga naga-aksyon. Ang mga arsonist gakabudlayan sang kalayo, pero si James Brown, 26-anyos, halin sa Northumberland, UK, gin-describe nga may obsesyon kag pag-idolize sa mga bombero imbes nga mahadlok sa mismo kalayo. Suno sa iya, handum niya mangin isa ka bombero kag masami niya ini gina-imagine, pero indi amu ini ang natabu, gani nagkontento na lang siya sa paglantaw sa mga bombero halin sa layo kag sa pirme nga pagtawag sa fire department. Sang daw indi na siya kuntento sina, nagsugod ini sindi sang ila balay agud lang makita ang mga bombero nga naga-giyo kag nagapatay sang kalayo. Sa gab-i sang Setyembre 9, 2023, gintawagan sang tag-iya sang balay ang emergency services kag ginreport nga may kalayo sa ila balay sa Eleventh Avenue, Ashington. Nagsiling siya nga may mga spark halin sa electricity meter kag ang mga habol sa sulod sang aparador nagsugod na man kalayo. Gintabangan sang mga bombero nga mapalong ang gamay nga kalayo kag gin-disconnect ang kuryente agud masiguro nga indi ini maglupok. Apang sang naglabay lang ang 90 minutos, nagtawag liwat si Brown sa fire brigade kag nagreport liwat sang sunog. Sa ikaduha nga beses, kinahanglan liwat sang mga bombero nga mapalong ang kalayo sa mga habol. Pero sang ginpamangkot nila ang tag-iya kon ngaa nagkalayo, ginbasol naman sini ang electricity meter. Apang wala na nagpati pa ang mga bumbero kag diri na nagsugod ang ila pagduda bangud nga sa una pa lang nga sunog, gin-disconnect na nila ang kuryente. Base sa court records, ginvideo ni James Brown ang mga bombero samtang naga-bomba sang tubig agud mapatay ang kalayo, kag daw excited pa siya nga ara sila sa iya propedad. Sang ginbackground check siya, nakita nga nakatawag siya sa fire department 80 ka beses sa nagligad nga 12 ka bulan. Sa ulihi, nag-ako siya nga may duha siya ka kaso sang arson nga may kahilabtanan sa kapabayaan Sang nagligad nga bulan, ginsentensyahan si James Brown sang walo ka bulan nga suspended sentence sulod sang duha ka tuig kag 150 ka oras sang wala bayad nga trabaho bangud sang iya mga sala sang 2023. Suno sa iya abogado, “daku gid ang iya paghinulsol” kag karon nagapangita siya sang bulig para sa iya obsesyon. Wala na siya nagtawag liwat sa fire department halin sang siya gin-aresto.
