Magapakigbahin ang 46 ka mga pamatan-on sang Diocese of Bacolod sa National Youth Day (NYD) 2025 nga patigayunon sa Archdiocese of Caceres sa ciudad sang Naga sa maabot nga Hunyo 10 tubtob Hunyo 14.
Sa interview sang DYHB kay Diocese of Bacolod, Commision of Youth Director, Rev Fr. Arnel ‘Pabs’ Pabalate, ginpahayag sini nga nakahanda na ang pamatan-on nga magapakigbahin sa nasambit nga aktibidad.
Suno kay Father Pabs, gikan sa nagka-lain lain nga bikaryato ang mga pamatan-on kag natalana nga magabyahe sumugod bwas nga adlaw Hunyo 9 kaupod ang apat ka mga kaparian.
May angut sa aktibidad, nagpatigayon sang send-off mass ang Commission on Youth sa pagpanguna ni Fr. Pabs nga ginhiwat alas-4 kaina sang hapon sa Chapel sang Sacred Heart Seminary Bacolod nga gintambungan sang pila ka mga delegates sa NYD.
Pahayag sang Youth Director, ang NYD ang gindihon sang Catholic Bishop’s Conference of the Philippines (CBCP) nga ginapatigayon sa tagsa ka isa ka tuig ukon every other year.
Tinutuyo sini nga magtipon ang mga pamatan-on sang simbahang katolika kag hatagan sang kahigayunan nga makihalubilo, mag-istorya, mag-presentar sang kultura, kag magpaambit sang ila tagsa ka mga faith experiences.
Panugyan ni Fr. Pabs sa mga delegado, aktibo nga magpartisipar sa mga gin-preparar nga aktibidad, kag dal-on ang mga natun-an kag eksperyensya padulong sa ila tagsa ka mga parokya.
Nagpalab-ot man ini sang pagpasalamat kay Bishop Buzon, mga kaparian kag sa tagsa ka mga parokya sa ila padayun nga pagsuporta sa kaangay nga aktibidad sang mga pamatan-on.