Sibilyan kag indi katapu sang rebelde nga grupo ang napatay sa engkwentro sa Sitio Bugtangan, Brgy. Buenavista, Himamaylan City, Negros Occidental sang Hunyo 6, 2025.
Ini suno sa Romeo Nanta Command – South Central Negros Guerilla Front sang New People’s Army (NPA). Una nan ga gin-report sang 3rd Infantry Division sang Philippine Army, nga ang napatay amo si Jun-Jun Benoy alyas Gringo, 24, residente sang Sitio Ompocon, Brgy. Mahalang, Himamaylan City.
Sa statement sang grupo nga gin-release Hunyo 8, wala sang engkwentro nga nagluntad sa lugar kag wala man sang unit sang NPA sa palibut sang amo nga tion. Suno pa sa grupo, ginkadtuan sang Army upod ang mga una nga nagsungka nga rebelde ang kamalig ni Benoy kag didto ini ginpatay.
Pahayag pa sang Romeo Nanta Command, isa lamang ka mamumugon sa talamnan si Benoy.
Dugang pa sa statement nga ang amay ni Jun-Jun nga si Judy ang gin-alegar nga gintayaan, ginpahog kag ginpahapa samtang ila ginpatay ang lalaki. Ginsiling man sang Romeo Nanta Command nga gintanom lamang ang armas nga M16 sa biktima.
Una nga ginpahayag sang Philippine Army nga nag-responde ang mga katapu sang 94th Infantry Battalion sa impormasyon angut sa presensya sang mga armado nga rebelde sa lugar sa diin naglab-ut sa lima ang ila naka-engkwentro. Na-recover kay Jun-Jun ang M16 nga armas luthang kag mga personal nga kagamitan.