Plano nga sudlon kag posible kawatan ang Metro Supermarket Sum-ag Branch nga nahamtang sang Purok Providence sakop sang Barangay Sum-ag ciudad sang Bacolod nga magaagi kuntani sa drainage kag lusot sa salog sang balaligyaan, nga nadiskubrihan pasado alas-5 sang aga, adlaw sang Miyerkules, Agosto 7.
Base sa pahayag ni Police Captain Michael Tuburan, Station Commander sang Bacolod City Police Station 9, antes nadiskubrihan ang buho sa sulod sang establisyemento, nabatyagan sang isa sa mga guard nga may nagapaniltig, amo nga ila ginlibot ang balaligyaan.
Sa paglibot sang mga gwardiya, ila nakita ang litik ukon guba nga bahin sang balaligyaan amo nga ila ini gin report sang mga kapulisan.
Gilayon nga ginlibot sang mga kapulisan ang lugar, lakip na ang drainage system sa gwa sang balaligyaan kag didto narekober ang hydraulic jack, steel saw, dako kag gamay nga crew bar, duha ka big flat screw driver, grinder, grinder disc, bolt cutter, kag mga kahoy.
Wala naman sang may nakuha ukon nakawat sa balaligyaan kag ginalantaw nga yara sa kapin tatlo ka mga persona ang amo nga kahimuan.
