Namyerdehan nalang si Rodgen Facundo sang Prk.Langis, Brgy. Banago sa tatlo ka banyera nga isda nga wala niya madul-ong sa mga merkado bangud kay gindakop ini sang Bacolod Traffic Authority Office(BTAO) nakaligad nga Pebrero 23 sa dalan Galo-Gatuslao bangud kay out of route kuno ini.

Si Rodgen nga isa sa mga founder man sang Pala-pala Jalandon Association (PAJALTODA) ang nagdepensa nga wala ini sang bayolasyon diin iya pa ginpamangkot ang traffic enforcer sang iya citation ticket apang wala lang ini siya ginsapak kag nagpadayon lang sa pag tow sang iya tricycle.

Nagsulat pa si Rodgen kay BTAO head Patrick Lacson agud magpangayo konsiderasyon kag i-waive ang towing kag storage fee bangud wala man ini sang sala nga may gin-ubra.

Suno kay Facundo nga iya ginpamangkot kon BTAO Personnel gid man bala ang nagdakop sa iya bangud wala man sini sang ID nga ginasuksok.

Pahayag ni Facundo nga kompleto man ang iya mga dokumento, may driver’s license kag rehistro man ang iya tricycle kag bisan ang pagbaligya sini isda ang may permit man.

Ginsunod pa ni Facundo ang tricycle niya nga gin-tow asta sa impounding area sa Lacson Street kag didto liwat siya nga nagpangayo citation ticket, kag sa liwat, wala ini gin hatagan.

Sa karon, masobra isa ka bulan na wala ka pangbaligya isda si Facundo bangud wala ini sang service nga magamit.

Nagpakig-angot man ang DYHB Sentro Serbisyo sa BTAO diin ginpahayag sang isa sini ka staff nga indi nila ma release ang tricycle samtang wala mabayaran ang P1,000 towing fee kag P200 a day nga storage fee

Masobra P20,000 man bili sang tatlo ka banyera nga isda nga nalub-ok sang gindakop si Facundo.

Nagpadala naman ini sang sulat sa opisina ni Councilor Al Victor Espino, chairperson sang SP Committee on Transportation.

DYHBnews

BTAO

Share this news