Ginapangabay ni Moises Padilla Mayor Ella Celestina Garcia- Yulo nga mahatagan sang long term solution ang problema natuhoy sa insurhensiya, matapos nga liwat naman nga may nagluntad nga engkwentro sa banwa.
Base sa pahayag sang alkalde nga makaluluoy ang mga pumuluyo nga apektado sang engwentro ukon nga residente nga natung-an kinagamo bangod sila ang ginpadulungan sang militar kag mga katapo sang New People’s Army agod makuhaan sang impormasyon kag pangayuan sang bulig.
Dugang pa ni Mayor Yulo, nga nagakadapat nga may matun-an ang gobyerno kag militar sa madugay na nga problema sa insurhensiya, kag indi solution ang mag pinatyanay.
Nagapati ang alkalde nga may nagaka-igo man nga pondo, pwersa, kag logistics ang gobyerno agod ma-solusyonan ang problema natuhoy insurhensiya kag inhustisya.
Samtang, nagdangat sa 154 ka mga indibidwal ukon 29 ka mga households ang nangin apektado sa nagluntad nga engkwentro sa Barangay Quintin Remo, Moises Padilla, Huwebes nga adlaw, Abril 4.
Base sa pahayag ni Vice Mayor Ian Villaflor sang amo nga banwa, nga personal niya nga gindul-ong ang iya bulig kag gikan sa Local Government Unit kaangay sang food packs kag bulig pinansiyal.
Ginapangabay sang bise-alkalde sa mga pumuluyo nga magpabalo kag mag-cooperate sa mga otoridad natuhoy sa mga ekpersiya sa lugar ilabi na sa mga presensiya sang mga katapo sang rebelde.
Aminado man si Villaflor nga wala untat ang engkwentro nga nagaluntad sa lugar bangod boundary ini sang Negros Oriental.
