Madamo sa aton ang nagapati gid sa zodiac signs—kun ano ang swerte himuon kag kun ano ang mga butang nga dapat likawan.
May ara sa mga ginatugyan nalang sa tadhana ukon pag “align” sang mga bituon sa langit ang mga pwede matabo sa palaabuton ukon future.
Isa ka Chinese company ang karon nakabaton sang kritisismo sa social media matapos ang mga ini nag-post sang job-ad sa diin ila gina-require nga dapat wala ginbata sa year of the dog ang mga maga-apply sa ila.
Ang nasiling nga kompanya nahamtang sa Guangzhou sa probinsya sang Guangdong ang sadto nagapangita sang administrative staff kun sa diin requirements sang mga ini ang work experience, familiarity sa office software kag 4,000 yuan ukon P32,000 nga bulanan nga sweldo.
Suno sa isa ka source, ginpahayag sini nga ang pag-hire sa mga empleyado nga nabata sa year of the dog ang indi maayo para sa isa ka negosyo kag magapugong sa pag uswag sang kompanya.
Pahayag naman sang publiko nga ini ang isa ka sahi sang “zodiac discrimination” sa diin pila sa mga ini ang nag-advise pa nga dapat pasakaan kaso sang mga nabata sa year of the dog ang nasiling nga kumpanya.
