Nagapanugyan ang Bacolod Traffic Authority Office (BTAO) sa publiko nga mangin mabug-at ang lakat sang trapiko sa patigayunon nga MassKara Festival 2024 Grand Salubong motorcade sa maabot nga Biyernes, Oktubre 11, 2024.
Ini matapos opisyal nga gin-anunsyo sang Bacolod Yuhum Foundation ang ruta para sa Grand Salubong Motorcade bilang kabahin sang ika-45 nga selebrasyon sang MassKara Festival.
Magasugod ang motorcade kickoff event las-3 sang hapon halin sa Araneta Street kag magatapos sa Bacolod City Government Center nga paga-updan sang kapin 60 sini ka mga sponsors.
Ang maga-upod sa motorcade magatipon malapit sa KIA Motors showroom sa Barangay Singcang-Airport kag magaagi sa Gonzaga, Gatuslao, North Capitol Road kag Lacson Street.
Gikan sa Lacson Street, ang motorcade magapadayon sa BS Aquino Drive, Hernaez Street sa South Public Market (Libertad) kag Lacson-Burgos Street antis ini magpadulong sa Circumferential Road tubtob sa BCGC grounds las 5:50 sang hapon.
Ang Bacolod City Local Government, kaupod ang Bacolod Yuhum Foundation ang nagapang-agda sa mga Bacolodnon kag mga bisita nga magpakigbahin sa MassKara Festival subong nga tuig. Ang selebrasyon ang magasugod Oktubre 11 kag magatakop naman sa Oktubre 27, 2024.
