Ginakalipay ni Moises Padilla Vice Mayor Adrian Villaflor ang pagka-dismiss sang kaso nga Murder batok sa iya kag 13 ka iban pa angot sa kamatayon ni Moises Padilla Councilor Jolomar Hilario sadtong 2019.
Sa Febrero 28 nga desisyon sang Guihulngan City RTC Branch 64, gin-abswelto ni Acting Presiding Judge Ma. Anna Priscila Pareja ang mga akusado sa pagluthang-patay kay SB Hilario sa sulod sang balay sini sadtong Marso 31, 2019, las-6:00 sang aga.
Suno kay Vice-Mayor Villaflor, nagapasalamat ini sa Guinoo bangud ang dismissal sang kaso ang nagapamatuod sang ila pagka-inosente.
Madumduman nga magluwas sa bise-alkalde, nalakip man sa mga akusado sanday Moises Padilla Councilor Vincent Bryan Garcia kag anay Isabela Mayor Joselito Malabor.
Nahibaluan nga gin-dismiss ang kaso bangud nga indi na interesado ang complainant sa pagpadayon sini kun sa diin tatlo ka beses ini nga wala nagtambong sa hearing.
Ginmanduan man sang korte ang mga abogado sang complainant nga magpasa sang e-mail nga nagapahibalo sa Public Prosecutor nga indi na sila interesado apang wala man sang pleading nga ginpasa kag wala man nagtambong sa Febrero 26 nga hearing.
Kadungan sang dismissal, ginmanduan sang korte ang BJMP Negros Occidental District Jail nga hilwayon ang tanan nga akusado nga yara sa ila nga kustodiya samtang ginapa-release ang piyansa nga ginbayad ni Villaflor kag iban pa sadtong 2022.
