Narekober sa gin-abandonar nga taxi sa ciudad sang Bacolod ang pila ka mga kagamitan nga ginapanag-iyahan ni Carl Kimberlyn Degabi, nga nasapwan sa Hacienda Nilo Lizares Barangay Matab-ang sa ciudad sang Talisay, sang tinalikdan nga Enero 12.
Ang biktima ang naga edad sang 32-anyos, call center agent, kag residente sang Barangay Mandalagan sa ciudad sang Bacolod.
Ginpahayag ni Police Major Rhazl Jim Jocson, Deputy Chief sang Talisay CPS, isa ka semana matapos nga nasapwan nga wala sang kabuhi si Degabi, may nakapiyar sang isa ka taxi nga gin-abandonar sa kilid sang highway sa ciudad sang Bacolod malapit sa ginaparkingan man sang pila ka mga taxi.
Sa pagpangusisa sang kapulisan, ila nakita ang isa ka hair clip kag cologne nga ginkompirmar sang pamilya ka biktima nga ini ang ginapanag-iyahan ni Degabi.
Magluwas sina may nakita nga semilya sa sulod sang taxi ang mga kapulisan, apang indi pa matumod kun ini ang dugo ukon ini ang seminal fluid bangod ila pa ginahulat ang resulta sa ginpatigayon nga eksaminasyon.
Sa pagtsekyar sang kapulisan sa nagapanag-iya sang amo nga taxi, wala na makaduty sa ila nga opisina ang isa sa mga nagabiyahe sang amo nga unit.
Dako ang posibilidad nga ang amo nga taxi driver ang suspetsado sa amo kamatayon sang biktima, suno kay Jocson.
