Ginalantaw karon sang kapulisan ang posibilidad nga sa lain nga lugar gin-utas ang kabuhi sang babayi nga nasapwan sa Barangay 1, Hinoba-an kag ginhaboy lang ini sa likod sang motorpool sa nasambit nga lugar tinalikdan nga Abril 30,2025.
Ang biktima ang ginkilala kay Thalia Evangelista, 24-anyos, residente sang Brgy. 2, Hinoba-an.
Sa karon, may yara naman sang persons of interest ang kapulisan sa diin nagapadayon karon ang ila imbestigasyon sa kaangtanan sang mga ini kay Evangilista.
Suno kay Hinobaan PNP Chief Police Major Jaynick Bermudez, padayon ang ila koordinasyon sa pamilya sang biktima agud makakuha pa sang dugang nga impormasyon sa kun ano ang gin-ubra kag ginkadtuan sang biktima antis natabo ang insidente.
Dugang pa ni Bermudez nga ila karon gina tsekyar ang mga CCTV footage sa palibot sang lugar sa diin nakita ang lawas sang biktima.
Suno pa sa pulis, wala sila sang may nakita nga ano man nga sign of struggle sa lugar.
Nahibaluan nga namyesta pa ang biktima antis ini gin-report missing sang iya himata.