CALATRAVA, Negros Occidental – Desidido ang grupo nga Juan Calatrava Movement nga pasabton ang mga responsable sa pag-demolish sang Talave Bridge nga nagaangot sang banwa sang Calatrava sa ciudad sang San Carlos.
Sa DYHB Eksperto Legal Program, ginpahayag ni Juan Calatrava Movement Chairman Andoni Llantada nga makabig nga inhustisya ang pagguba sang taytay nga gintukod pa sadtong 1933 kag amo na lamang ang nagapabilin nga pre-war bridge sa Negros Occidental.
Suno kay Llantada, ginakilala sang National Historical Commission of the Philippines ang Talave Bridge bilang isa ka heritage structure kun sa diin mismo ang NHCP ang nagapamatok sa pag-demolish sini.
Ginrekomendar man sang ahensiya nga ipreserbar ang Talave Bridge samtang ginausar na ang bag-o nga taytay nga gintukod sa tupad sini apang sa pihak sini, gindayon sang Department of Public Works and Highways (DPWH), paagi sa pag-endorso sang City Government sang San Carlos, sa rason nga isa na ini ka “safety hazard”.
Suno kay Llantada, liwat sila nga nagsulat sa NHCP kag diri igabase ang masunod nga tikang batok sa mga responsable sa demolisyon sang taytay. I Juan Calatrava Movement photos
