Masobra sa P900,000 ang kahalitan sa sunog sa isa ka balay sa Bangga Cory sakop sang Brgy. Taculing ciudad sang Bacolod pasado alas 3 sang hapon, adlaw sang Miyerkules, Agosto 7.
Suno sa Bureau of Fire Protection (BFP), ang nasambit nga balay ang ginapanag-iyahan ni Diana Arricibita kag ang tatlo ka pamilya ang apektado. Ang nasambit nga balay ang may yara sang mga naga-renta.
Base naman sa nauna nga interview sang DYHB kay Gelyn Garinggalo, nagarenta sa amo nga balay, suno sa iya antes nga nagluntad ang sunog, yara ini siya sa balcony, sang hinali lang nakabati ini siya sang lupok, apang iya ginlauman nga nagikan lamang ini sa idalom sang balay kun sa diin nahamtang ang balaligyaan sang tubig.
Pagpadulong ni Garinggalo sa kwarto sang balay, iya nakita ang kalayo sa salog kag pagkatangla niya nagalamon na ang kalayo sa kesame.
Wala sang may naluwas nga kagamitan sa amo nga balay si Garinggalo sa insidente.
Samtang suno kay Fire Superitendent Jenny Mae Masip, Fire Marshall sang Bureau of Fire Protection-Bacolod padayon pa ang imbestigasyon sa nagluntad nga sunog.
Juliet
Juliet Alimodian Panes
LOCAL NEWS/ AUG. 8
Matapos ang sunog sa Bangga Cory kahapon sang hapon, isa naman ka balay ang nasunugan sang kagamitan Bangga Langis, Brgy. Banago, Bacolod City kagab-i.
Las-8:24 kagab-i sang nagluntad ang sunog sa puluy-an ni Jean Saboya. Kalakip sa nasunog nga kagamitan sini ang plastic cabinet kag helmet.
Yara sa P250 ang balor sang kahalitan sa nasambit nga puluy-an.
